Tra u Murrazzu e u Sabbiuni
c’è a bedda spiaggia r’Agnuni;
è ne pressi ri Sirausa
unni l’acqua è cchiu raddusa.
Pari Acapulcu su a talii ra Essu
ma quannu t’avvicini pari propriu ‘n cessu;
pp’arrivarici, a strada nunn’ a taliari:
basta ‘nghiuriri l’occhi e stari a ciarari.
All’ingressu c’è a barracca ra vaddiana,
pocu cchiu avanti chidda re cudduruna;
‘n facci o mari c’è ‘n unicu locali
ccu na pocu ri seggi e quattru pali:
prima era bar, albergu e ristoranti
e ci ievunu sempri tutti quanti,
ora è sulu bar e pizzeria
e ogni tantu cca musica ni camurria.
Ri matina c’è paci e u mari è bellu,
poi, no pomeriggiu, sbummica u buddellu:
muturi, pattiti e pruvulazzu
ogni gghionnu n’arrumpunu... u cazzu.
U “bumm” ediliziu scoppia a Ferraustu,
quannu spuntanu capanni ri ogni gustu,
e ‘ntempu nenti tuttu u litorali
si inchi ri monovani e bilocali;
tuttu u jonnu i genti stanu accampati
e onnumani ... si cuntanu i cacati.
A vigilia, tra jochi ‘i focu, falò e gavittuni,
e villeggianti si ci rumpunu i cugghiuni.
Però è speciali a sabbia r’Agnuni,
ccu tutta a munnizza e i scocci ri miluni.
Quannu c’è a “voria” nun si pò stari,
e puru ‘n facci a potta pari ri vulari;
l’acqua ro mari ri alghi sempri è gghina
e ogni tantu fa fetu ri sintina,
ma, quannu poi c’è u Punenti,
s’appulizia tutta ‘ntempu nenti;
su ‘a ‘mmitari ‘n’ospiti, perciò, ‘a stari attentu
e prima ‘a biriri ri unni ciuscia u ventu....
(estate 1990)
Chista era Agnuni ri chinnici anni fa,
ma ora ppi tanti cosi assai megghiu va;
cull’impegnu ri l’Associazioni
s’ana fattu tanti innovazioni:
prima ri tuttu nu bellu murettu,
unni ognunu rici: “ m’assettu”;
ana fattu a strada, u marciaperi
e no lungomari si pò fari avanti e arreri;
cch’e ddocci na spiaggia a genti si pò lavari
e a rina r’in coddu si pò scruddari.
U Triangulu acchiui funziona beni
e tanti ospiti giornalmenti teni;
supra a sabbia si fanu i jochi ppe picciriddi
ca ppa cuntintizza arrivanu e stiddi;
e poi canzuni, spittaculi e animazioni
tenunu allegri in tutti i situazioni;
ne festi ra sira c’è sempri ‘n saccu ri genti,
su nun sata a sirata picchì... manca a correnti,
e, macari ca nuddu ci pò fari nenti,
l’importanti è dirici paroli o Prisirenti,
quannu, inveci, iddu s’impegna assai pp’Agnuni
‘nsemmula a tutti chiddi ri l’Associazioni.
I villeggianti, poi, venunu ri tutti i paisi,
ma ppa maggior parti sunu Lintinisi;
ci nn’è ri Carruntini, ri Catania e, casu stranu,
c’è nu gruppu ca veni ro Palemmitanu;
quali Mondellu, Cefalù e Mazzafunnu...
ppi iddi Agnuni è u megghiu postu ro munnu.
Ci vulissi sulu ‘n pocu cchiu ri civiltà,
soprattuttu ri cu veni ri ccà e di ddà.
E comunqui megghiu r’Agnuni spiaggi nun ci nn’è,
ri unni
ti voti voti, unni è gghiè.
(estate 2005)